Laiza Digital Library masing hpe e Norway du Wunpawng myu sha ni hku na, tinang kanu mungdan hta e shanu shingbyi nga ai sai daw sai chyen ni mungkan prat dep hpaji hpe lu sharin la mu ga ngu n htawm hpaw hpang dat ai rai nga ai. Dai ni na rawt jat galu kaba lawan la ai prat hta, internet n tsa sharin la mai ai hpaji ni myu hkum hkra nga taw sai re. Internet n tsa e hpaji lam hte seng n na mying gumhkawng la nga ai Khan Academy hte MOOCs(Massive Online Open Courses) ni gaw internet kaw mai sharin hkaja la ai hpaji ni a sakse ni rai nga ai.
Rai tim mung, kanu mungdan hta shanu shingbyi nga ai anhte a Wunpawng saidaw saichyen ni gaw, n dai zawn re manu dan la ai hpaji ni hpe sharin la lu na n loi la nga ai. Hpa majaw ta nga yang, computer hte internet ni yak hkak ai a majaw re. N dai zawn re manghkang hpe maga mi hku n na lu hparan lu na matu n dai digital library masing hpe hpang wa ai re. N dai library hta e, computer ni hpe matut mahkai da htawm laika bok ni, hpaji sumla hkrung ni hte Offline Khan Academy zawn re ni hpe bang da ya na re. N dai gaw project a lam kadun mi rai sai.
N dai digital library masing kawn masat da ai pan dung lahkawng nga mali ai. Ya yang e, kanu mungdan hta byin taw nga ai dinghku majan a majaw, jawng ma n kau mi hpaji hpe lu matut sharin la na yak hkak nga ai. Nambat langai pan dung hku n na gaw, Laiza snr Mai Ja Yang mare na jawng ma ni hpe hpaji lu matut sharin la hkra shakut ya na lam re. Nambat lahkawng hku n na gaw, n dai zawn re computer garum hte hpaji lu sharin la ai rai yang, sharin hkaja ai lam hta mung lawan ai hku lu sharin la htawm, computer hpaji mung grau chye jat wa na re ngu hpe kam ga ai. Computer hte seng n na hkut hkut nai nai chye da yang she, dai ni na prat dep mungkan hta anhte a jawng ma ni shang shing jawng lu na rai nga ai.
Myit su ni mu ai hte maren, n dai project gaw n loi la nga ai. Galaw ra ai bungli law ai sha n ga, n dai masing a matu ap-nawng ai ni mung n lu n la, n rau n hkrau re kaw na she shakut hpang taw nga sai re. Dai majaw, n dai project awng dang na matu gaw myit su wa a garum ningtum lam mung ra la nga ai. N chye n kaw rai di jawm shakut taw ai re majaw, hpaji jaw la ai lam hku mi rai rai, n dai website kaw a lu ja gumhpraw bang garum ai hku mi rai rai garum la na hpe mung kam kaba hte lat nga na ga ai. Chyeju kaba sai.
For more details: FAQ
Contact: brangnu@gmail.com